अपहरणकर्ता गुप्ताद्वारा ँमध्यस्थकर्ता’ को नाटक पनि

पूर्वमन्त्री तथा सभासद श्यामसुन्दर गुप्ताले व्यवसायी पवन संघईको अपहरणमा संलग्न भए पनि पीडित परिवारलाई चाहिँ अपहरितलाई मुक्त गराइदिने मध्यस्थकर्ताको नाटक गरेर फिरौती हात पारेको खुलेको छ । 

'अपहरणमा उनको प्रत्यक्ष संलग्नता थियो,' महानगरीय अपराध अनुसन्धान महाशाखाका एसएसपी देवेन्द्र सुवेदीले भने, 'अर्कातिर पीडित परिवारसँग मध्यस्थकर्ता जस्तो भूमिका खेलेका थिए ।' गत पुस ७ गते कमलादी गणेशस्थान अपहरणमा परेका संघई फिरौती बुझाएर २७ गते मुक्त भएका थिए । प्रहरीले गुप्ताको योजनामा अपहरणमा संलग्न गुप्तासहित ५ जनालाई पक्राउ गरेपछि उनको यस्तो बहुरंगी भूमिका खुलेको हो । पक्राउ परेका चारै जनाले ६५ वषर्ीय सभासद गुप्ताको योजनामा अपहरण तथा फिरौती असुलीलाई कार्यान्वयन गरेको बयान दिएका छन् । पत्रकार सम्मेलनमा तिनीहरूले गुप्ताकै अघि यस्तो बताएका थिए ।

अपहरणमा गुप्ता मुख्य योजनाकार रहेको एसएसपी सुवेदीले बताए । 'लामो अनुसन्धान र थुप्रै प्रमाणबाट गुप्ताको संलग्नता पुष्टि भयो,' उनले थपे । अपहरणमा संलग्न आकाश लामा र विकास लामा भनिने जितबहादुर गोले आइतबार हेटौंडामा समातिएपछि उनलाई पक्राउ गरिएको हो । यसपछि बालाजुका किशोर पाण्डे र उनका चालक अमिर आचार्य पक्राउ परेका छन् ।

अपहरणमा संलग्न अरू फरार छन् । पक्राउ परेका लामाद्वयलाई गुप्ताले लेनदेनमा फसेको १ करोड रुपैयाँ उठाउनुपर्ने भन्दै अपहरणमा प्रयोग गरेका थिए । चालक आचार्यसँग चिनजानका आधारमा गुप्तालाई भेटेको तिनले बताएका छन् । 'फोन गरेर भेट्न बोलाइएको थियो,' आकाशले भने, 'डुबेको पैसा उठाउने भए ४/४ लाख दिने भनेपछि लोभमा परियो ।'

प्रहरीका अनुसार अपहरणको योजना गुप्ताको कुसुन्तीस्थित निवासमा बनाइएको थियो । पुस ७ गते बिहान गुप्ताले किशोर पाण्डेलाई गाडीमा राखेर संघईलाई चिनाउने कामका लागि कमलादी गणेशस्थान छाडेका थिए । संघई मन्दिरतिर आएपछि माइक्रोबसमा आएका ४ जनाले जबर्जस्ती गाडीमा हालेर कुपण्डोल पुर्‍याएका थिए । 'सुरुमा भद्रकाली मन्दिरको छेउमा गाडीभित्रै बसेर सूचना लिइरहेका गुप्ता कुपण्डोलसम्म माइक्रोबसको पछिपछि गएका थिए,' सुवेदीले भने । कुपण्डोलमा गाडी परिवर्तन गरी रातो टाटा सुमोमा राखेर आकाश र विकाससहितको टोलीले संघईलाई धुलिखेल हुँदै सस्र्युंखर्क पुर्‍याएको प्रहरीको दाबी छ । बाटामा कतै जाँच हुन सक्ने अनुमान गरी मन्त्री गुप्ता धुलिखेलसम्म पुगेका थिए । उनले अन्य सहयोगी श्याम गिरी र अमर लामालाई प्रयोग गरेर वीरगन्ज र रक्सौलबाट 'मधेसी रेड आर्मी' र 'डिफेन्स आर्मी' का नाममा फोन गर्न लगाई फिरौती मागेको प्रहरीले जनाएको छ । सुरुमा २५ करोडबाट फिरौती माग गरे पनि पीडित परिवारले दिन नसक्ने भएपछि संघईलाई बन्धक बनाउनुपर्ने दिन लम्बिएको थियो । लामो समय बितेपछि संघईलाई बन्धक बनाएर बसेका विकास र आकाशले गाउँमा शंका हुन थालेकाले धेरै दिन राख्न नसक्ने बताएपछि अपहरणकारी थोरै फिरौतीमा छाड्न तयार भएका थिए ।

यसपछि संघईलाई अपहरणमुक्त गराउन सक्छु भन्दै परिवारको सम्पर्कमा पुगेका थिए । उनले आप+mै डिल्लीबजारबाट ८५ लाख रुपैयाँ कालो र रातो प्लास्टिकको झोलामा हालेर अपहरणकारीलाई दिन भनी ल्याएको उनका चालक अमिर आचार्यले बताएका छन् । त्यसै रात संघई मुक्त भएका थिए । गुप्ताले अपहरणमा सहयोगी भूमिका निर्वाह गर्ने ७ जनालाई घरमा बोलाएर ४/४ लाख रुपैयाँ दिएको बताएका छन् । बाँकी रहेको २० लाख  छोराको बिहेपछि दिने बताएका थिए । उनी बाँकी रकम लिएर छोराको बिहेका लागि भैरहवा पुगेका थिए । त्यहींबाट प्रहरीले उनलाई सोमबार पक्राउ गरेर ल्याएको थियो ।



अनुसन्धान कसरी ?

मन्दिर गएका संघई अपहरणमा परेको खबरपछि प्रहरीले परिवारसँग सम्पर्क गर्न खोजेको थियो । परिवारले अपहरणमा परेको बताए पनि विस्तृत विवरण केही खुुलाएनन् । अपहरणकारीले परिवारका मान्छेलाई फोन गरेर २५ करोड फिरौती माग गरे । प्रहरीले परिवारलाई फोन आएको नम्बरको डिटेल निकाल्यो । फोन भारतको रक्सौलबाट आएको थियो ।

घरी गोरखा त घरी वीरगन्जबाट फोन आउन थाल्यो । अपहरणको निकै दिन बितेपछि अपहरणकारीले फोन सम्पर्क बन्द गरिदिए । त्यही बेला पूर्वमन्त्री गुप्ताले संघई परिवारका सदस्यलाई आफूले अपहरणकारीका तर्फबाट मध्यस्थकर्ताको भूमिका निर्वाह गर्ने सूचना प्रवाह गरे । प्रहरीलाई खबर नगर्नसमेत सूचना प्रवाह गर्ने व्यक्तिले भनेको थियो । वीरगन्ज रामप्रसाद रौनियारसँग संघई परिवारको लेनदेन विवाद हुँदा रौनियारका तर्फबाट विवाद मिलाउन तम्सिएका गुप्ता अचानक सघईलाई अपहरणमुक्त गराउन सक्रिय भएपछि प्रहरी सशंकित भयो । गुप्तासँगको नियमित टेलिफोन सम्पर्कमा रहेका व्यक्तिहरूलाई ल्याएर सोधपुछ गर्दा प्रहरीले अपहरणमै संलग्न व्यक्ति फेला पारेको थियो । एक सातादेखि गुप्तासँग नियमित सम्पर्कमा रहेको एउटा मोबाइल नम्बरलाई निगरानीमा राखेको थियो । त्यही नम्बरबाट अपहरणकारीसम्म पुगेको हो ।

-अपराध महाशाखाका एक अधिकारीसँगको कुराकानीमा आधारित)

प्रकाशित मिति: २०६८ माघ ४ ०९:४०